మాధవ్‌కు సపోర్ట్ చేస్తున్న నర్సు అంతు చూడాలనుకుంటుంది రాధ. నర్సుని పిలిచి జరిగిందంతా ఆరా తీసి చెంప పగలగొడుతుంది. మరోవైపు ఆదిత్యని ఇంటికి వెళ్లిపోమని చెబుతుంది. అదే సమయంతో సత్యకు లొకేషన్ పంపించి చికిత్సాలయం దగ్గరకు రప్పిస్తాడు మాధవ్. రుక్కు, ఆదిత్యలు మాట్లాడుకోవడం చూసి షాక్ అవుతుంది సత్య. ఆ తర్వాత అక్టోబర్ 7 ఎపిసోడ్‌లో ఏం జరిగిందో చూద్దాం..
ఆదిత్య క్యాంపుకు వెళ్లలేదని తెలిసి పదేపదే దెప్పి పొడుస్తుంది సత్య. దాంతో ఆదిత్యకు చిరాకు కలుగుతుంది. నువ్ వెళ్లిన క్యాంపు ఇదేనా అంటూ మాధవ్ పంపిన ఫొటోను చూపిస్తుంది సత్య. అది చూసి కంగుతింటాడు ఆదిత్య. ముఖ్యమైన వర్క్ ఉందంటూ నువ్ వెళ్లిన క్యాంప్ ఇదేనా అంటూ భర్తని నిలదీస్తుంది. దాంతో ఆదిత్య నోట మాట కరువవుతుంది. జానకమ్మ వైద్యం కోసం వెళ్లానంటూ చెప్తుండగానే.. సత్య క్లాస్ పీకుతుంది. నీకు మాకంటే వాళ్లే ఎక్కువయ్యారా? అంటూ బాధపడి వెళ్లిపోతుంది. జానకమ్మకు వైద్యం చేసిన డాక్టర్ తన ఆరోగ్య పరిస్థితిని చెబుతుంది రాధతో. ఆమెకు చికిత్స చేయడం కష్టమంటూ చెప్తుంది డాక్టర్. పేషెంట్‌కు నచ్చిన వాతావరణంలో ఉంటేనే ట్రీట్‌మెంట్ బాగా పనిచేస్తుంది అంటుంది. మీకు నెలకు సరిపడా మూలికలు, మందులు ఇస్తాను.. ఇంట్లోనే వైద్యం చేసుకోండని చెప్తుంది. చేసేదేమి లేక సరేనంటుంది రాధ.
సీన్ కట్ చేస్తే.. దేవుడమ్మ సత్యకు పాలు తీసుకొచ్చి ఇచ్చి ఆదిత్యకు ఇవ్వమంటుంది. అత్త మాట కాదనలేక పాలు తీసుకుని వెళ్తుంది భర్త దగ్గరికి. కొడుకు, కోడల్ని బయటి నుంచి గమనిస్తుంది దేవుడమ్మ. ‘ఏంట్రా మీ ఇద్దరి సమస్య’ అంటూ ప్రశ్నిస్తుంది. వాడు నిన్ను పాండిచ్చేరికి తీసుకెళ్లకుండా క్యాంపుకు వెళ్లాడనే ఇలా దూరం దూరంగా ఉంటున్నారా అని అడుగుతుంది సత్యని. నాకు పనుందమ్మా అంటూ తప్పించుకునే ప్రయత్నం చేస్తాడు ఆదిత్య. నేను మాట్లాడుతుంది మీ గురించే… విజయదశమి రోజు మీ ఇద్దరి చేతుల మీదుగా ముత్తైదులందరికీ చీర, గాజులు పంచుతానని మొక్కుకున్నానని చెప్పి వెళ్లిపోతుంది దేవుడమ్మ. సత్య కూడా పాల గ్లాసు అక్కడే వదిలేసి కోపంగా వెళ్లిపోతుంది. సత్య, ఆదిత్యల పరిస్థితిని భర్తకు చెప్పుకుంటూ బాధపడుతుంది దేవుడమ్మ. భార్యాభర్తల మధ్య ఇవన్నీ మామూలే కదా అంటాడు తను. లేదు.. వాళ్ల మధ్య దూరం పెరిగిపోతుంది. ఏదో ఒకటి చేయాలంటుంది భర్తతో.
ఆ తర్వాత సీన్‌లో రాధ… జానకితో మీరేం పరేషాన్ కాకండి. రేపే మనం ఇంటికి పోతున్నామని చెప్తుంది. అంతలోనే అక్కడికి వచ్చిన పిల్లల్ని దగ్గరికి పిలుస్తుంది జానకి. సైగలు చేస్తూ ఏదో చెప్తుంది కానీ అది వాళ్లకి అర్థం కాదు. పిల్లల్ని లోపలికి వెళ్లమని జానకితో మిమ్మల్ని విడిచిపెట్టి నేను ఎట్ల పోతా అంటుంది రాధ. మాధవ్ సారుకు భయపడి మిమ్మల్ని విడిచిపెట్టి పోను అని ధైర్యం చెబుతుంది జానకికి. మాధవ్ ఈ మాటలన్నీ చాటుగా వింటూ సంతోషిస్తాడు. ఇక మా అమ్మని కోలుకోకుండా చేస్తాను అనుకుంటాడు మనసులో.
మరుసటి రోజు ఉదయం దేవుడమ్మ ఇంట్లోని వారంతా ఏదో కార్యక్రమానికి బయల్దేరతారు. సత్యని తీసుకుని ఈ కారులో రా ఆదిత్య అని చెప్తుంది దేవుడమ్మ. అలా ఒకరి కారు వెనక మరొకరి కారు బయల్దేరుతుంది. అప్పుడే ఆదిత్యకు రుక్కు ఫోన్ చేస్తుంది. మై లైఫ్ అని సేవ్ చేసుకున్న నెంబర్ చూసి షాకవుతుంది. కావాలని సత్య ఆ కాల్ లిఫ్ట్ చేస్తుంది. ‘పెనిమిటి ఏడున్నావ్. మేం జానకమ్మని తీసుకుని ఇప్పుడే ఇంటికి వచ్చినం’ అని చెప్తుంది రుక్మిణి. ఆ మాటలు విన్న సత్య.. ఒక్కసారిగా నిర్ఘాంతపోతుంది. ఆదిత్యకు కూడా నోటి వెంట మాట రాదు. పాపం ఆదిత్య ఎలా తప్పించుకుంటాడో తెలియాలంటే తరువాతి ఎపిసోడ్ వరకు ఆగాల్సిందే..
