Bandi Sanjay : బీజేపీ నాయకుడు, కేంద్ర మంత్రి అమిత్ షా రీసెంట్‌గా టాలీవుడ్‌కి చెందిన అగ్ర క‌థానాయ‌కుడు ఎన్టీఆర్‌ను ప్ర‌త్యేకంగా క‌లిసిన సంగ‌తి తెలిసిందే. RRR సినిమా చూసిన ఆయ‌న‌కు ఎన్టీఆర్ న‌ట‌న న‌చ్చింద‌ని, ఈ నేపథ్యంలో తారక్ను ప్రశంసించేందుకు హైద‌రాబాద్‌లో ప‌ర్య‌ట‌న‌కు వ‌చ్చిన‌ప్పుడు ప్ర‌త్యేకంగా క‌లిశార‌ని వార్త‌లు వ‌చ్చాయి. కానీ లోగుట్టు వేరే ఉందని అందరికీ తెలిసిన విషయమే. అదేంటనేది పక్కాగా తెలియకున్నా విషయం మాత్రం వేరే ఉందని స్పష్టంగా తెలుసు. అయితే ఇటీవల ఏపీ బీజేపీ నాయకుడు సోమూ వీర్రాజు మీడియాతో మాట్లాడుతూ.. ఎన్టీఆర్ సేవలను వాడుకుంటామని వెల్లడించారు. దీంతో జనాలకు కొంత క్లారిటీ వచ్చింది.
అమిత్ షా వ‌చ్చే ఎన్నిక‌ల్లో బీజేపీ త‌ర‌పున ఎన్టీఆర్‌ను ప్ర‌చారం చేయ‌మ‌ని కోరిన‌ట్లు నెట్టింట వ్యాపించిన వార్తలకు సోమూ వీర్రాజు వ్యాఖ్యలతో బలం చేకూరినట్టైంది. అలాగే తెలంగాణ బీజేపీ ముఖ్య‌మంత్రి అభ్య‌ర్థిగా తారక్ను ప్ర‌క‌టిస్తార‌ని కొంద‌రన్నారు. ఏపీలో తెలుగు దేశం పార్టీని ఎన్టీఆర్ లీడ్ చేయ‌బోతున్నారని, అమిత్ షాతో భేటీ సారాంశం అదేనంటూ కూడా న్యూస్ వచ్చింది. మరో వాదన ఏం వచ్చిందంటే బీజేపీ తెలుగు రాష్ట్రాల్లో ఎక్కువగా వార్తల్లో ఉండేందుకు బీజేపీ అగ్ర నేతలు ఇలా ప్లాన్ చేశారంటూ వార్తలొచ్చాయి. వీరి భేటీపై ప్ర‌ముఖ రాజ‌కీయ పార్టీల‌కు చెందిన నాయ‌కులు సైతం త‌మ‌దైన విశ్లేష‌ణ‌లు కూడా చేశారు. కానీ ఏం జ‌రిగింద‌నే దానిపై అమిత్ షా, ఎన్టీఆర్..ఇంకా మీటింగ్‌లోని ఇత‌ర ప్ర‌ధాన నాయ‌కులు ఎవ‌రూ చెప్పలేదు.
Bandi Sanjay : అందుకే కలిశారు.. అపార్ధాలు అనవసరం..
ఎట్టకేలకు తెలంగాణ బీజేపీ అధ్య‌క్షుడు బండి సంజయ్ అమిత్ షా – ఎన్టీఆర్ భేటీపై క్లారిటీ ఇచ్చారు. అస‌లేం జ‌రిగింద‌నే దానిపై కీల‌క వ్యాఖ్య‌లు చేశారు. ‘‘అమిత్ షా గారు ఎన్టీఆర్‌ను క‌ల‌వ‌టంపై కొంద‌రు టీడీపీకి చెక్ పెట్ట‌డానికి అనుకుంటున్నారు. కొంద‌రేమో సంధి కుదుర్చుకోవ‌టానికి అంటున్నారు. రెండూ త‌ప్పే. RRR సినిమా చూసిన‌ప్పుడు అమిత్ షా గారు ఎన్టీఆర్‌తో ఫోన్ చేసి కూడా మాట్లాడారు. అదే క్ర‌మంలో అమిత్ షా గారు తెలంగాణకు వ‌చ్చిన‌ప్పుడు గుర్తొచ్చి ఆయ‌నే ఫోన్ చేసి కలిశారు. సినిమా ప‌రంగానే చ‌ర్చ జ‌రిగిందే త‌ప్ప.. మ‌రేం చ‌ర్చ జ‌ర‌గ‌లేదు. భేటీ స‌మ‌యంలో అక్క‌డ నేను కూడా ఉన్నాను. సినిమా గురించిన చర్చే జ‌రిగింది. సీనియ‌ర్ ఎన్టీఆర్ గురించి వారి కుటుంబ స‌భ్యులు గురించి మాట్లాడారు. రాజకీయాలు గురించి మాట్లాడ‌లేదు. ఈ క్ర‌మంలో భేటీపై అపార్ధాలు అనవసరం’’ అని బండి సంజయ్ పేర్కొన్నారు.
